परिचय लैङ्गक हिंसा पीडित महिला तथा बालबालिकाहरुलाई एकीकृत रुपमा स्वास्थ्य सेवा, मनोसामाजिक विमर्श, चिकित्साजन्य प्रमाण संकलन र संरक्षण, अल्पकालीन आश्रय, कानूनी उपचार, आवश्यक सुरक्षा व्यवस्था र परिवार वा समुदायमा पुनस्र्थापना तथा जीविकोपार्जनमा सहयोग गर्ने उद्देश्यले तोकिएका अस्पतालहरुमा एकद्वार संकट व्यवस्थापन केन्द्रको स्थापना गरिएको हो ।
महिला र बालबालिकाहरु विभिन्न प्रकारका लैङ्गिक हिंसाबाट प्रभावित हुने गरेका र यसबाट उनीहरुमा शारीरिक, यौनजन्य तथा मनोबैज्ञानिक असर पर्ने गरेको छ । यस्ता समस्याहरुको एकीकृत र प्रभावकारी उपचारको व्यवस्था हालसम्म नभएको परिप्रेक्ष्यमा स्वास्थ्य मन्त्रालय मुख्य कार्यान्वयनकर्ताको रुपमा जिम्मेवार हुने गरी नेपाल सरकारबाट स्वीकृत लैङ्गिक हिंसा अन्त्य तथा लैङ्गिक सशक्तीकरण सम्बन्धी राष्ट्रिय रणनीति तथा कार्ययोजना, २०६९-२०७४ अनुरुप लैङ्गिक हिंंसालाई प्रभावकारी एवम् कूशलतापूर्वक सम्बोधन गर्नको लागि जिल्लास्थित अस्पतालहरुमा एकद्वार संकट व्यवस्थापन केन्द्र स्थापना गरी सञ्चालनमा ल्याइएको छ ।
कुनैपनि हिंसा पीडित महिला तथा बालबालिकाहरुले स्वास्थ्य उपचार, कानूनी उपचार, मनोसामाजिक परामर्श जस्ता सेवा लिन विभिन्न निकायमा जानुपर्ने अवस्थाको अन्त्य गरी एकै ठाउँबाट उपरोक्त सेवाहरु सहज रुपमा उपलब्ध गराउन यस जिल्ला अस्पताल, धनकुटामा पनि मिति २०७४ पौष महिनादेखि लैङ्गिक हिंसा सम्बन्धी एकद्वार संकट व्यवस्थापन केन्द्र (OCMC) स्थापना भई सञ्चालन गरिएको हो ।
उद्देश्य सबै प्रकारका लैङ्गिक हिंसा प्रभावितहरुलाई स्वास्थ्य उपचार लगायत अन्य आवश्यक सेवाहरु एकीकृत रुपमा उपलब्ध गराई लैङ्गिक हिंसा नियन्त्रणमा सहयोग पुर्याउने ।
हिंसाका प्रकार
क) बलात्कार
ख) यौनजन्य दूर्व्यवहार
ग) शारीरिक हिंसा
घ) जवर्जस्ती विवाह
ङ) अधिकारबाट वञ्चित गराउने
च) मानसिक हिंसा, आदि ।
यस केन्द्रबाट प्रवाह हुने सेवाहरु
स्वास्थ्य उपचार सेवा,
मनोसामाजिक परामर्श सेवा,
सुरक्षा,
सेवा केन्द्रको सञ्चालन,
कानूनी परामर्श तथा उपचार,
पुनर्स्थापना, आदि ।
लक्षित वर्ग
सबै किसिमको लैङ्गिक हिंसाबाट प्रभावित व्यक्तिहरु,
मानव बेचविखन तथा ओसारपसारमा परी हिंसामा परेका महिला तथा बालबालिकाहरु,
लैङ्गिक हिंसाको जोखिममा रहेका वेवारिसे तथा शारीरिक÷मानसिक रुपले अशक्त महिला तथा बालबालिकाहरु,
लैङ्गिक हिंसा पीडित उकल महिला, अपाङ्गता भएका महिला, बालबालिका तथा ज्येष्ठ नागरिक महिला,
सशस्त्र द्वन्द्व तथा प्राकृतिक विपदका कारण हिंसामा परेका र पर्न सक्ने महिला वा बालबालिका,
मानसिक स्वास्थ्यमा गम्भीर समस्या उत्पन्न भई घर वा सार्वजनिक स्थानमा अलपत्र अवस्थामा जीवन जिउन बाध्य महिला तथा बालबालिकाहरु, आदि ।
अस्पतालको तर्फबाट सन्देश
लैङ्गिक हिंसा कानूनी एवम् सामाजिक अपराध हो ।
लैङ्गिक हिंसा अन्त्य गरौँ, सभ्य समाजको निर्माण गरौँ ।
तपाई हिंसामा पर्नुभएको छ र कसै माथि हिंसा भएको देख्नु भएको छ भने यस अस्पतालमा रहेको एकद्वार संकट व्यवस्थापन केन्द्र (OCMC) मा सम्पर्क गरी स्वास्थ्य उपचार, कानूनी तथा मनोसामाजिक परामर्श सेवा उपलब्ध गराउन सहयोग सम्पर्क व्यक्तिलाई सम्पर्क गर्नुहोस ।
